Манай улс 2.6 сая хүнд 73 төрлийн нэг их наяд 653 сая төгрөгийн халамж өгч байна

2020-10-19 61

УИХ дахь Ардчилсан намын бүлэг өнөөдөр /2020.10.19/ хуралдаж Монгол Улсын 2021 оны төсвийн асуудлаар байр сууриа илэрхийллээ. Ардчилсан намын зүгээс төсвийн зарлагын бодлогыг эргэн харах шаардлагатай гэж үзжээ.

– Ардчилсан намын бүлгийн зүгээс энэ оны төсөв 13 их наяд 872 тэрбум байсан бол ирэх оны төсөвт 14 их наяд төгрөгийн төсвийн зарлага байхаар оруулж ирсэн нь дөрвөн жилийн өмнөхөөс даруй хоёр дахин их хэмжээнд төсвийн зарлагыг тэлсэн байна. Мөн сонгуулийн өмнөх жилүүдэд төсвийн зарлага огцом нэмэгддэг  асуудал дагуулж байна.

-2021 оны төсвийн алдагдал 2.1 их наяд, 2022 онд 1.6 их наяд, 2023 онд 1.4 их наяд байхаар төлөвлөсөн нь 2020-2023 оны хооронд Монгол Улсын төсөв 10 их наяд төгрөгийн алдагдал хүлээхээр байна.

-Засгийн газрын өр 7 тэрбум 891 сая ам.долларт хүрсэн. Тиймээс  ядаж  төсвийн алдагдлыг өр хэлбэрээр үлдээж нэмэгдүүлэхгүй  байж энэ алдаагаа засах ёстой гэж үзлээ.

-Халамжийн бодлого хэтэрхий хавтгайрч хяналтаа алдсан төдийгүй өнөөдрийн байдлаар манай улс 2.6 сая хүнд 73 төрлийн нэг их наяд 653 сая төгрөгийн халамж өгч байна. Энэ асуудалд мэргэжлийн байгууллагуудын хүрээнд сайтар судлаж, зөв шийдвэрлэхгүй бол халамжийн бодлого “Ядуурлаас аврах биш ядуурал уруу түлхэх” бодлого болоод байгаад бүлгийн зүгээс дүгнэлтэд тусгахаар ажиллаж байгааг мэдээллээ.

-УИХ дахь Ардчилсан намын бүлгийн зүгээс коронавируст халдвар /Ковид-19/-ын цар тахлын үеийн төсөвт ул суурьтай хандах, тэвчиж болох, хойшлуулж болох зардлуудыг гаргаж эрэмбэлэх, төсвийг тэлэх бус эдийн засгийг тэлэх чиглэлд бизнесийн эрхлэгчид, баялаг бүтээгчид, ЖДҮ эрхлэгчдээ дэмжих бодлогод түлхүү анхаарах шаардлагатай байгаа талаар хэлэлцэж, дүгнэлтээ тусган чуулган нэгдсэн хуралдаанд танилцуулахаар боллоо.

Мөн өнөөдрийн хурлаар  Нийгмийн даатгалын сангийн 2021 оны төсвийн тухай хуулийн төслүүдтэй хамт өргөн мэдүүлсэн Төсвийн тухай хуульд нэмэлт, өөрчлөлт оруулах тухай, Монгол Улсын Засгийн газрын тухай хуульд  нэмэлт, өөрчлөлт оруулах тухай, Малын тоо толгойн албан татварын тухай, Татварын ерөнхий хуульд нэмэлт, өөрчлөлт оруулах тухай, Хувь хүний орлогын албан татварын тухай хуулийн зарим заалтыг хүчингүй болгох тухай, Нийгмийн даатгалын шимтгэлээс чөлөөлөх, ажилгүйдлийн даатгалын сангаас дэмжлэг үзүүлэх тухай хуульд нэмэлт, өөрчлөлт оруулах тухай хуулийн төслүүдийг хэлэлцлээ.

Холбоотой мэдээ